星期四, 9月 10, 2009

減肥? 食得招積, 唔係絕食

以下內容, 純粹個人意見, 請找專業註冊營養師去了解正確的資訊

前3篇同大家講過, 減肥一定要有原因, 要有目標, 要有數據, 要清楚自己身體卡路里吸收量等等, 未睇過嘅, 請去下面個link 重溫吓:
http://hk.myblog.yahoo.com/tony-karen/article?mid=37968

大家記得, 減肥係令自己變得健康, 係為自己, 唔係因為人地話我肥先去減, 唔係因為要去飲先減

減肥係長遠, 持久, 改變自己飲食習慣去維持一個健康嘅體重, 講過好多次, 唔改變自己飲食習慣, 就算你點做, 體重下降完都會好易打回原形, 長期咁上上落落, 身體就唔會再減到肥(所謂嘅搖搖效應), 健康亦會越來越差

今日主題:食得招積, 唔係絕食

無錯, 好多人以為要瘦, 就要絕食, 大家可能諗, 我哩兩個月日日食菜, 唔食肉, 實瘦啦

咁我會問, 瘦完, 你係唔係會繼續日日食菜先? 係唔係以後都食菜唔食肉先? 如果唔係, 咁你瘦完, 一食返同以前一樣咁, 身體就會肥返

身體就係咁, 你唔比佢食一排, 佢一有機會接觸你戒食嘅食物, 就會加強吸收力, 你戒糖3個月試吓, 你一食返糖, 身體會比平時對糖吸收反應增大, 所以絕食反而係得不嘗失, 除你一世唔食, 否則唔好諗唔食哩個方法

food_trangle.jpg (55710 bytes)

最簡單就係先學識咩要食多, 咩要食少, 而唔係唔食佢, 就算零食都可以食

好多見到食物金字塔都會話, "超!, 我夠知咩要食多, 咩要食少啦"

無錯, 你知, 但係好多人都唔知食多食少, 都要配合時間, 簡單啲講, 早餐, 要食得好似皇帝咁, 午餐, 要食得好似有錢佬咁, 晚餐, 就要食得似難民咁

點解呢? 因為早上食嘅, 有1日活動時間將食物轉化嘅能量消化, 午餐就只得半日, 晚飯就只得幾小時(之後都瞓覺, 唔需要太多能量), 當人活動, 能量會消失, 唔會致肥, 但當人少了活動, 能量過多的話, 就會儲存, 成為脂肪, 所以你晚刻食太多, 如果仲食埋宵夜, 但晚間活動又無的話, 咁你一定會好易肥

有啲人會話, 小飯多餸可以減肥, 其實只係啱一半, 適量嘅飯小肉多菜先可以減肥, 而小飯多肉會仲肥, 因為飯脂肪少, 但肉脂肪多

而另一樣要留意, 就係我地一日要幾多卡路里先夠呢, 如果你未計, 請去:
http://hk.myblog.yahoo.com/tony-karen/article?mid=37853

實例:

以我為例, 1日要約2400, 1日食3餐, 即係每餐可以食800卡路里啦, 但配合時間, 我會改成, 早500, 午1200, 晚700,  咁樣編排, 我早餐食得唔多, 因為我要返工, 無咩時間整咁多野食, 所以放重係午餐到, 到晚餐就會食少啲

有了數據, 就好易編排我要食嘅份量, 以我作例子, 午飯同晚飯, 我一定會食1碗, 即係250卡路里左右, 早上我會食2塊白麵包, 即係220, 咁我剩低可以食嘅卡路理就會係: 早280, 午950, 晚450

我每晚煮嘅晚餐, 包括餸同菜, 我都會留1/3作午餐, 1/3作晚餐食, 太太食得少, 所以只需1/3就夠佢晚同午餐用

我平時炒菜會落油, 即係菜平均約有100卡路里1碟, 100 嘅1/3, 即係午同晚餐, 有35卡路里, 當50啦, 咁我剩低可以食嘅卡路理就會係: 早280, 午900, 晚400

如果我平時炒啲餸, 當1500卡路里, 分開1/3, 咁都係500卡路里一餐, 只要將晚餐份量減少啲, 將佢帶去午餐, 我晚餐就唔會超過要吸引份量, 午飯仲淨好多卡路里, 可以比我下午茶時間吃個生果, 飲杯咖啡等等 (約100-150卡路里)

1500卡路里係自己屋企係好難整得到, 1磅豬肉先有850左右, 汁料100左右, 配料都係150左右, 即係約1200左右, 如果間中食吓海鮮, 無皮雞, 瘦肉咁, 每碟最多都係900 

而早餐, 我加啲火腿, 或牛油果沾都可以, 完全唔會超過吸收量

每日剩餘300-500卡路里, 約儲夠3500就可以減一磅左右, 再加埋運動, 要瘦又要飽都唔係話真係好難, 如果真係唔夠飽的話, 可以增加菜嘅份量, 菜本身好少卡路里而且無咩脂肪, 多食又可以飽肚, 又健康

下次再講點樣可以出街食啲, 又唔會超過卡路里吸收量

22 則留言 :

  1. 每樣食得平均一點就算. 菜..生果就一定食多一點.
    [版主回覆09/11/2009 04:01:00]平均哩樣野, 如果無計清楚, 好容易會超過都唔知
    我以前都係咁諗, 後來發覺, 原本我每日食啲野, 好容易超標, 所以改變左自己飲食習慣, 選擇食多啲飽肚但唔多卡路里食物, 而食少啲多脂肪, 高卡路里食物, 短短1個月, 已經瘦左5磅

    回覆刪除
  2. 我覺得最緊要有節制和做運動.... 我覺得下下計住我會冇哂人生樂趣
    [版主回覆09/11/2009 23:23:00]如果真係有決心減, 數據/統計/制度一定要做, 無辦法
    下下計著等自己可以節制啲, 唔係唔食, 樂趣仍然存在

    回覆刪除
  3. 通少, 你講得好岩ga!
    我減肥只係節食同做運動, 節食唔等於絕食. 而家我雖然減肥, 不過我無戎口, 好多嘢都食, 只係控制食量, 我輕輕鬆鬆一年已經減咗40磅.
    我覺得如果真係想減肥, 千祈唔好心急. 我見好多人都食好少或唔食, 其實係非常唔好. 越抑制食慾, 暴食機會會越大.
    好似通少話, 食得招積, 要識"揀食", 同埋食嘅先後次序.
    [版主回覆09/11/2009 23:26:00]40磅, 嘩, 好成功呀, 無錯, 減肥唔可以心急, 好多人比好多錢減肥, 結果咪反彈囉
    無錯, 野要照食, 只係食少啲, 唔需要大飲大食, 按自己應該食嘅份量去食

    回覆刪除
  4. ~.:'*小雪*':.~2009年9月11日 上午1:32

    我係減磅成功例子, 我由140磅減到得番依家110-115(呢個range里啦)
    其實減肥絕不可以絕食,有菜有肉有益既野一定要食番, 係要多d菜小d肉,油,糖一定要有唔可以多,仲要配合運動!!運動係好好好重要,只靠絕食黎減肥,你一食番就會反彈,唯有邊節食邊做運動先可以將你體內既肥因子打散再復合成瘦因子..
    我已經減左一年幾兩年, 有時會超過117呢個range, 但只要我食番清淡,幾日又會落番磅,你既體內積存唔易肥既因子後,要減個幾磅再唔係難事,當然最好keep住一星期有2,3次運動啦!
    [版主回覆09/11/2009 23:28:00]你都好成功, 非常好
    因為你有運動, 所以你身陳代謝比無做運動快, 所以卡路里燃燒比無做運動嘅人多, 所以你要降低體重唔難
    下次我會再講, 就算出街食, 超1-2次標都唔怕, 只要唔好太過量就可以

    回覆刪除
  5. ~.:'*小雪*':.~2009年9月11日 上午1:34

    115先岩...sorry

    回覆刪除
  6. 哈哈, 而家連減肥都分享, 正呀!!!
     
    [版主回覆09/11/2009 23:28:00]見太多人減肥都好亂黎, 咪分享吓囉

    回覆刪除
  7. 見到個金字塔令我諗番起細個讀書亞sir都有介紹過而個塔
    [版主回覆09/11/2009 23:29:00]哈哈, 我細個都要讀

    回覆刪除
  8. 真是好介紹呢!這個 chart 我也有在加拿大政府的網頁看到過,但還是通少的介紹比較實用!謝謝分享!
    [版主回覆09/11/2009 23:34:00]我都係copy返嚟嘅, 哈哈

    回覆刪除
  9. 我都係跟食物金字塔減肥,兩個半月減左二十幾磅,效果都唔錯,減肥真係唔可以只靠節食,一定要飲食均衡同做運動.
    [版主回覆09/15/2009 02:03:00]無錯, 運動係扶助, 飲食均衡先係最重要

    回覆刪除
  10. 加油呀通少~~~~
    [版主回覆09/15/2009 02:03:00]我會呀

    回覆刪除
  11. 您唔會掛住減肥唔出食譜呱?
    [版主回覆09/15/2009 02:03:00]傻啦, 我咁為食, 又點會唔出食譜喎

    回覆刪除
  12. 濃情朱古力碰上士多啤梨2009年9月13日 上午1:19

    你講得冇錯呢, 食多d菜少d肉就可以減到肥呢, 同埋都要有適量運動
    [版主回覆09/15/2009 02:04:00]無錯, 好多人都以為食少啲飯, 其實飯唔可以少

    回覆刪除
  13. 我有親戚11月結婚, 我都要開始減啦! 多謝你的分享呀!
    [版主回覆09/15/2009 02:04:00]減肥係長期, 持久式嘅行動, 唔係為了1個日子

    回覆刪除
  14. Welcome To My Rose Garden2009年9月13日 上午5:11

    食得健康, 要如何去挑食物係好緊要
    [版主回覆09/15/2009 02:05:00]無錯, 否則瘦到無用

    回覆刪除
  15. 要計算對我來講是困難, 我都係採取食小 d, 不過睇完通兄的分享, 我會遲些找時間計計先, 3q!
    [版主回覆09/15/2009 02:05:00]食少d ok, 不過有數據會容易分析問題係邊

    回覆刪除
  16. It's hard to stick with it.  My diet tip is portion control.
    [版主回覆09/15/2009 02:06:00]it is actually what i said here.  Portion control and not "not eating"

    回覆刪除
  17. 嘩!一個月就瘦咗 5 磅嗱?你就好啦!我就難啲了,因為老公大人鍾意我陪佢食嘢,我明明已經嗌咗話飽,但佢就好似聽唔到咁,成日挾餸落我個碗度,我唔食,佢又唔開心,我覺得佢有心質肥我 o架,激死!
    [版主回覆09/15/2009 02:07:00]呵呵, 你老公錫你呀
    不過你下次煮少啲咪得囉, 佢都唔夠食, 就自然唔會"質"你食

    回覆刪除
  18. 見你寫得咁有心機, 都想學下, 睇落好易, 但我知實行一定困難重重, 樣樣計住哂實無心機 ? ! 你居然瘦咗5磅真係直得恭喜!
    [版主回覆09/15/2009 02:09:00]有得必有失, 要瘦得健康, 一定要付出努力
    計著唔代表唔開心, 因為我一樣咩都照食, 知道自己要食幾多反而識得停, 唔需要再擔心係唔係食得太多, 係唔係超標
    計著計著, 反而令我更覺安全

    回覆刪除
  19. 我公司都有個同事日日淨係食早餐(滾水麥皮/滾水粟米片)然後返到公司咩都唔食唔飲~但我地係做零售業~一個鐘都講咗唔少嘢~正常都會口乾啦~但佢可以依然唔飲水~到1點食lunch~佢又唔食嘢~連水~都唔飲一滴~所以佢個口超臭~超惡頂~好喇~到收工~佢返到屋企就食個公仔麵~然後又到第二朝~日日如是者~佢減咗咁耐~我地都唔覺得佢有瘦過~反而仲肥咗添~可能正因為佢咩都唔食~放工返屋企先食麵~所以吸收得仲快啦~話極佢都唔聽~都唔知而家d 人減肥係咩心態?!
    [版主回覆09/15/2009 02:11:00]聽你咁講, 你個同事減不得其法, 最錯就係唔食午餐同唔飲水
    仲有, 晚上食公仔麵, 超高卡路里而不健康, 我相信佢健康好快會出現問題

    回覆刪除
  20. 通少:   ~你除咗分享煮野食, 仲分享依啲健康野, 我好喜歡睇依啲健康知識架!! 因為現在, 真係好多人, 唔岩channel, 一尾唔食野=健康!! 聽到都驚!! 食飯時, 又話依樣唔食, 個樣唔食, .....不如, 唔好約人食飯喇!! 好攞命!!   ~我仲聽過啲人, 話去買啲唔知咩cream, 因為用啲cream 按模會達到瘦身效果!! 聽完我都打個"特"!!    ~依排見你都用水果煮餸, 你個健康減肥進展成點呀??
    [版主回覆09/23/2009 20:52:00]好多人減肥只係短線, 減完好快打回原形, 非常之愚蠢
    減肥係長期的, 減就要用啱嘅方法先得
    我暫時減左6磅, 最近無做運動, 所以減得慢啲

    回覆刪除
  21. 有d咩係飽肚但唔多卡路里食物呀?我都好想知呀!!我好驚肥..成日都好似有一餐,無一餐甘,唉...
    [版主回覆10/23/2009 08:27:00]例如水煮蛋啦, 1隻約100 卡路里, 又胞, 又低卡路里 栗子啦, 1粒得約 0.5 卡路里 留意多啲啲營養標籤, 將卡路里除重量, 越少越好

    回覆刪除
  22. wow......very nice!!! definitely will try my best to follow the diet anyway, can i know what's the calories for a bowl of soup?? say, anything with spare rib/pork soup?
    [版主回覆12/05/2009 02:55:00]what type of soup?
    spare rib/pork soup for 1 bowl is around 100-150 Caloires without eating the meat.

    回覆刪除

Related Posts Plugin for WordPress, Blogger...